ဇူလိုင် ၂၆ – ၂၀၂၅
SN (VOM)
၂၀၂၅ ခုနှစ် တက္ကသိုလ်ဝင်စာမေးပွဲကို အကျဉ်းထောင်တွေကနေ ဝင်ရောက် ဖြေဆိုခဲ့သူတွေထဲက အကျဉ်းသား ၁၇ ယောက် စာမေးပွဲ အောင်မြင်ပြီး သုံးဘာသာဂုဏ်ထူးရှင် ခြောက်ယောက် ပါဝင်တယ်လို့ မြန်မာနိုင်ငံ စာစစ်ဦးစီးဌာနမှ သိရပါတယ်။
အင်းစိန် ဗဟိုအကျဉ်းထောင်နဲ့ မန္တလေး ဗဟိုအကျဉ်းထောင် (အိုးဘို) မှ အကျဉ်းသား ၁၇ ယောက် စာမေးပွဲ အောင်မြင်ခဲ့တာမှာ ဂုဏ်ထူးနဲ့ အောင်မြင်ခဲ့သူ စုစုပေါင်း ၁၄ ယောက်ရှိတာဖြစ်တယ်လို့ သိရပါတယ်။
ရန်ကုန် အင်းစိန်ထောင်က ၁၀ ယောက် ဖြေဆိုတာမှာ သုံးဘာသာဂုဏ်ထူးရှင် တယောက်၊ နှစ်ဘာသာဂုဏ်ထူးရှင် သုံးယောက်၊ တဘာသာဂုဏ်ထူးရှင် လေးယောက်နဲ့ ရိုးရိုးအောင်သူ နှစ်ယောက်ရှိပြီး ဖြေဆိုသူအားလုံး အောင်မြင်ခဲ့တာ ဖြစ်တယ်လို့ သိရပါတယ်။
အလားတူ မန္တလေး ဗဟိုအကျဉ်းထောင်မှလည်း အကျဉ်းသား ခုနစ်ယောက် ဝင်ရောက် ဖြေဆိုခဲ့တာမှာ သုံးဘာသာ ဂုဏ်ထူးရသူ ငါးယောက်၊ နှစ်ဘာသာ ဂုဏ်ထူးရသူ တယောက်၊ ရိုးရိုး အောင်မြင်သူ တယောက်ဖြစ်ပြီး အားလုံး အောင်မြင်ခဲ့တယ်လို့ သိရပါတယ်။
အခုလို အကျဉ်းကျနေသူတွေ တက္ကသိုလ်ဝင်တန်း စာမေးပွဲ အောင်မြင်ခဲ့တာနဲ့ ပတ်သက်လို့ လူ့အခွင့်အရေး လှုပ်ရှားသူတယောက်က
“သူတို့အတွက် အခွင့်အရေးတရပ် အနေနဲ့ ပြစ်မှု ကြီးကြီးမားမား ကျူးလွန်ထားသူမျိုး မဟုတ်ရင်တော့ လျှော့ရက် ပေးတာမျိုး၊ ပြင်ပမှာ ပညာ ဆက်သင်နိုင်ဖို့ လွတ်ငြိမ်းခွင့်ပေးတာမျိုး ဖြစ်စေချင်တယ်။ အရှေ့မှာလည်း ဒါမျိုး ရှိခဲ့ဖူးတော့ လက်ရှိ တက္ကသိုလ်ဝင်တန်း အောင်မြင်သွားတဲ့ အကျဉ်းကျနေသူတွေ အတွက်ကိုလည်း ဒီအခွင့်အရေးမျိုး ရစေချင်တယ်” လို့ ပြောပါတယ်။
ကမ္ဘာ့လူ့အခွင့်အရေးကြေညာစာတမ်း အပိုဒ် ၂၆ မှာ “လူတိုင်း ပညာသင်ကြားခွင့်ရှိသည်” ဆိုတဲ့ ပြဋ္ဌာန်းချက်အတိုင်း အကျဉ်းကျနေတဲ့ စာမေးပွဲ အောင်မြင်သူတွေ ပညာဆက်လက် သင်ယူနိုင်ဖို့အတွက် သက်ဆိုင်ရာဌာနမှ စိစစ် ဆောင်ရွက်ပေးစေလိုတယ်လို့ သူက ပြောပါတယ်။
ပြီးခဲ့တဲ့ အစိုးရ လက်ထက်ကတော့ တက္ကသိုလ်ဝင်တန်း စာမေးပွဲမှာ ဂုဏ်ထူးနဲ့အောင်တဲ့ အကျဉ်းသူ၊ အကျဉ်းသားတွေကို နိုင်ငံတော် သမ္မတက လွတ်ငြိမ်းချမ်းသာခွင့် ပေးခဲ့ပြီး ရိုးရိုး အောင်မြင်သူတွေကိုတော့ လျှော့ရက်ခံစားခွင့် ပေးခဲ့ဖူးတာ ရှိတယ်လို့ ဆိုပါတယ်။
“ကျွန်တော်သိသလောက် တက္ကသိုလ်ဝင်တန်း အောင်ပြီးသူတွေဟာ အဝေးသင်တက်လို့ရတယ်။ ထောင်မှာ ဆရာပြန်လုပ်ရင် လျှော့ရက်ပိုရတယ်” လို့ အကျဉ်းထောင်အကြောင်း သိရှိသူတယောက်က ပြောပါတယ်။
ပြီးခဲ့တဲ့ ၂၀၂၄ ခုနှစ် တက္ကသိုလ်ဝင်တန်း စာမေးပွဲမှာလည်း အင်းစိန် ဗဟိုအကျဉ်းထောင်ကနေ ဖြေဆို အောင်မြင်သူတွေထဲက တယောက်ဟာ မြန်မာတနိုင်ငံလုံး ဝိဇ္ဇာဘာသာတွဲ တတိယ အမှတ်အများဆုံးနဲ့ ရန်ကုန်တိုင်းမှာ ဝိဇ္ဇာဘာသာတွဲ ပထမဆုရခဲ့တယ်လို့ သိရပါတယ်။
လွန်ခဲ့တဲ့ ၂၀၂၃ ခုနှစ်ကတော့ တနိုင်ငံလုံးမှာရှိတဲ့ အကျဉ်းထောင်တွေကနေ ဝင်ရောက်ဖြေဆိုသူ ၄၈ ယောက်ရှိတာမှာ ၄၄ ယောက် အောင်မြင်ပြီး ၄၁ ယောက် ဂုဏ်ထူးထွက်ခဲ့တယ်လို့ သိရပါတယ်။
လက်ရှိ ၂၀၂၅ ခုနှစ်၊ တက္ကသိုလ်ဝင်စာမေးပွဲမှာ ကျောင်းသားကျောင်းသူပေါင်း နှစ်သိန်းကျော် ဝင်ရောက် ဖြေဆိုခဲ့ပြီး ကိုးသောင်းကိုးထောင်ကျော် အောင်မြင်ခဲ့တာဖြစ်ကာ အောင်ချက် ရာခိုင်နှုန်း ၄၈ ဒသမ ၀၆ ရာခိုင်နှုန်း ရှိခဲ့တာ ဖြစ်ပါတယ်။
ပြီးခဲ့တဲ့ ၂၀၂၄ ခုနှစ်၊ တက္ကသိုလ်ဝင်စာမေးပွဲမှာတော့ ဖြေဆိုသူပေါင်း တသိန်းနှစ်သောင်း ကိုးထောင်နီးပါး ရှိပြီး အောင်မြင်သူပေါင်း ခုနစ်သောင်း လေးထောင့်ခြောက်ရာနီးပါး ရှိခဲ့ကာ အောင်မြင်မှု ရာခိုင်နှုန်း ၅၇ ဒသမ ၉၀ ရာခိုင်နှုန်း ရှိခဲ့တယ်လို့ သိရပါတယ်။
အခု ၂၀၂၅ ခုနှစ် တက္ကသိုလ်ဝင်စာမေးပွဲဟာ ပြီးခဲ့တဲ့နှစ်နဲ့ နှိုင်းယှဉ်ပါက ဖြေဆိုသူဦးရေ ရှစ်သောင်းခန့် တိုးလာပေမယ့်လည်း အောင်မြင်မှု ရာခိုင်နှုန်း ၁၀ ရာခိုင်နှုန်းခန့် ကျဆင်းခဲ့တယ်လို့ သိရပါတယ်။
Photo – ပုံဟောင်း
